Warum de Fritz Walder im Fernsehe schwarz-weiß is
Do bische platt: Wie de Paul de FCK feiert - Steckt im Trikot wie die Bluudworschd in de Pell
Von Wolfgang Ohler
Wie"s meim Freind, em Paul geht, wolle ner wisse? Ei der feiert immer noch de Uffstiech vom 1. FCK. Der war jo außer Rand un Band, als se"s gepackt gehatt hann. Jetzat sitzt er jede Owend drowwe im roode Trikot in unserer Stammkneip un loßt jeden Spieler vum Betze mit em Schöppche hochlebe. Des Hemdche hat er sich kaaf, als die Lauderer 1991 mi"m Kalli Feldkamp Meeschder worr sinn. Alla, do hat de Paul noch 30 Pund wennischer gehatt. Heit steckt"er in dem Trikot drin wie die Bluudworschd in de Pell un kann kaum schnaufe. Un er hat selbert zugebb, dass em sei Mona mit aller Gewalt nin helfe muss, alleen dääd"er des ganimmie schaffe. Awwer er is guud druff un ruft alle Gebott: Wenn das bloß de Fritz noch erlewe kennt. Un dann drinkt er e Extra-Schöppche uff de Fritz Walder, weil der doch desjohr neinzich worr wär. Un dennoh dribbelt er heem, de Paul, ohne Ball, awwer mit em Mordsrausch.
Geschder hab ich glei gemerkt, dass"m e Laus iwwer die Lewwer geloff is. Er hat do in seim enge Hemdche gehockt, de Paul, un gans leedisch an seim Schoppe gedrunk. Hasche des ah gesiehn, im Werbefernsehe? hat er mich gefrood. Was soll ich gesiehn hann Paul? Ei die Werbung mi"m Fritz. Des is doch net in Ordnung: Do zeichen se de Fritz Walder un de Breitner Paul un de Völler Rudi, awwer de Fritz in schwarz-weiß un die zwee annere fabisch. Dodebei kenne doch die zwee Hampelmänner dem Fritz net es Wasser reiche. Ach so, hab ich gemeent, jetzat vesteh ich. Awwer Paul, des is doch bloß e Anspielung uff des Fernsehe domols zum Fritz seine Zeide, wo"s des Farbfernsehe noch gaa net gebb hat un die Bilder all schwar-weiß ware. Deshalb saad de Fritz dann am Schluss ah: Liewer schwarz-weiß als mit so enner Frisur, wie ihr se hann. Domit macht er sich iwwer denne Struwwelpeter, de Breitner Paul, un die Tante Käthe, de Völler Rudi mit seiner Dauerwell, luschdisch. Vesteh"sche, Paul!
Es hat e bissje gedauert bis er"s vestann hat, in seim enge Hemdche fallt"m offenbar ah es Denke schwer. Awwer dann war"er widder mit de Welt sefriede. Ei klar, hat"er gemennt, des Schwarz-Weiß wär jo sowieso viel besser gewest un ah de Fußball un es Bier un iwwerhaupt, alles viel besser als heit. Un do druff hammer dann noch dabber e Schöppche gedrunk.
SALZMAT
Quelle:
Verlag: DIE RHEINPFALZ
Publikation: Zweibrücker Rundschau
Ausgabe: Nr.107
Datum: Montag, den 10. Mai 2010
